गजल 

सम्झना बगेर आउँदै छन् छालहरूमा ॥
कयौँ याद टाँसिएका छन् रूमालहरूमा ॥

समस्याभित्रै समाधान लुकेर बसेको हुन्छ
जवाफ निहित छ तिम्रै सवालहरूमा ॥

गरीब लाचार भएर कति चाँडै घाट पुग्छ
पैसाले जीन्दगी किनिन्छ अस्पतालहरूमा ॥

केहि गर्दा पनि जब बलेन घरको चुलो
भोक पस्केर दिन्छिन् आमा थालहरूमा ॥

आश्रममा छोडेर हिँड्ने बेला छोरोले भन्यो -
बा ! बिउ जोगाउनै पर्छ अनिकालहरूमा ॥

तिमी परदेश हिँडेदेखि आजसम्मै पनि
मेरा आँखा टोलाई बस्छन् झ्यालहरूमा ॥

कोहिकसैमा भेटिएन आज त्यस्तो देशभक्ति
जस्तो हिजो हुने गर्थ्यो गङ्गालालहरुमा ॥