गजल

देशलाई भत्काएर अचेल, ऊ घर बनाउँदै छ ॥
यसरी ऊ कोमल मुटुलाई पत्थर बनाउँदै छ ॥

यो कस्तो रवैया हो उसको ? बुझ्नै सकिनँ मैले
आफै प्रश्न बनाउँदै छ, आफै उतर बनाउँदै छ ॥

मर्नु त छदैछ एकदिन भन्ने पाठ सिकाउनै हो कि ?
बन्दुक देखाएर कसैकसैलाई निडर बनाउँदै छ ॥

अरे यार, जग मजबुत भए मात्रै घर मजबुत हुन्छ
यत्ति बुझेर पनि किन त्यही जग धरमर बनाउँदै छ ॥

आखिर तिम्रो उदेश्य के हो ? यहि सोध्नु छ ऊसँग 
जसले यति हराभरा जङ्गललाई बगर बनाउँदै छ ॥