देश खाइरहेछन्

   चोक्टा-चोक्टा लुछेर यो देश खाइरहेछन् ॥
   मान्छेकै भेषमा उ: हेर, गिद्दहरू आइरहेछन् ॥

   ए हजुर, गिद्दले पनि मासु मात्र खान्छ होइन ?
   यहाँ त देशको एक-एक हड्डी चपाइरहेछन् ॥

   आखिर के रहेछ रहश्य बुझ्नै सकिनँ मैले
   घर जलाएर उनीहरू किन मुस्कुराइरहेछन् ॥

  खुसी-हाँसो, उत्साह- उमङ्ग क्षणिक हुन् हाम्रा
  दु:ख कष्ट अनि अभावचाहिँ स्थायी रहेछन् ॥

  महाशय, हामी पनि अलिअलि बुझ्दै छाैँ- राजनीति 
  कोको नुन छर्किदै छन्, कोको मलम लगाइरहेछन् ॥
                                          
                                    - शंकर निरौला 'निरक्षर'
                                             फत्तेपुर, सप्तरी ।